أجمل غزل في شعر صبية .

طلب الشاعر المرحوم خليل روكز من الشاعر مارون كرم أن يكتب قصيدة لذات الشعر المقصوص على أن يكتب هو قصيدة مماثلة وتبدأ القصيدتان بـ (شعرك الكان يلفني وينام) ونشرت القصيدتان في مجلة صوت الجبل للشاعر فؤاد قرداحي. والقصيدتان هنا

Poem:
الشاعر خليل روكز

شعرك الكان يلفني وينــام
لفة عيون الطفـل بالأحـلام
ومنو لحالو كان يتخصّـل
خصلة خديدية وخصلة حرام
وأغفى وشعرك يسهر عليي
وبغفوتـي يسـبل عا عينيي
وأوعى ولفُّـو بين إيـديي
متل الملاك بتخت ريش نعام
ولما كنت أصحى من الوهلي
وجدّلّـلك بالعتــم عا مهلي
وجدايلـك تضحـك وتندهلي
وتقول: خلصنـي من الاعدام
بيظهر عِرِف شعرك رح تقصِّيه
وكان يندهلي تا إشفع فيــه
وما في إلو غيري، وأنا مربيه
وبيني وبينـو فرَّقو الأيــام
وانتي ضميرك بالعمي موصوف
ومتلك الحلاق مـا بيشـوف
وصار شعرك متل شي خاروف
عم يحتمي بالديب من اللحـام
وانت يا حلاق بدعـي عليـك
انشالله ينقل هـمّ قلبي ليـك
أصعب ما تعمي وييبسوا يديك
ويصير عمرك مدرسة أوهام
كيف لك يا قلب تقطع أمل عمري
وانتي يا ام الأملس الخمري
فطمتي طفل رابي على غمري
تا تعيشيه عا سفرة الأيتـام
كيف المقص الفوق شعرك مَرّ
طاوع ابن آدم عا فعل الشَرّ
ويا هلترى مطرح ما شعرك هر
ما انفلشت حكاية من الآلام
هيدي حكايي من دموعي البكر
البقيو من عيوني بشعرك ذكر
هودي نقط من شمع قدس الفكر
هودي ألف قاموس اسـتفهام
بعدو معي منديلك الأصلـي
بكرّمو، وبعاملــو بِأَصلـي
وتا يضل يبكيلك، ويرقصلي
من شعرك البيحن عا وصلي
انكان عندك بعد شي خصلي
ابعتيـها ذكـر للمنديــل
حتى يشَّـبع جوعتو وينـام
خليل روكز
*********
أماالشاعر مارون كرم فكتب

شعرك الكان يلفني وينــام
ويطير فيي بجانح الأحــلام
يا ما نظمتلـو قصايد بكـر
ما خطّهـا شاعر ولا رسّـام
شعرك الأشقر متل ضو الشمع
الكان يلمـع بالليــالي لمـع
يـاما ويامـا محممو بالدمـع
وممشـطو للخـلف ولقـدام
كنت منّـو لـعب ما اشـبع
لفّـو عَـإيدي مقطع ومقطـع
بالكون كلـو شـعر ما بقشع
يا حبال شمس مخايلي عا رخام
قديش بدها تنوح المخــدي
الهامت بشعرك هالحلو قدي
وقديش بدو يفقـدو خـدي
اللي فضلو عا ألف ريش نعام
وقديش بدّو التخـت يتخسّـر
لما بيعرف شـعرك تقصّـر
وقديش بدها قلوب تتحسَّــر
لمـا يشوفوكـي بهالهنـدام
كنتي ذا بالحي مشيتي شـويّ
تعمليلي مظاهــرة بالحـيّ
هيدا يصرخ آخ، هيــدا خيّ
هيدا يرشك ورد هيدا خـزام
هيدي تناقر جوزها المفجـوع
هيدي تهـدّي ابنها المنـزوع
هيدي تشارع خيَّها الموجـوع
لكن بشـرعي مـا حدا بينلام
بدعي على الحلاق، شو ذنبو
معقول، مش ما معقول ما حبو
وما قصّرو، ولا طاوعو قلبو
لو ما كـان لهالقرش خــدّام
بدعي على التمدين، وعالموضة؟
بدعي على أذواق ممروضـة
بدعي عا عصر النور والفوضى
يلعن أبو التمـدين والأيــام
المن شعرك المشَّـقر حرموني
وشالو حلم أخضر من عيوني
ولو ما تكوني شوي مجنونـي
ما تركتي مقص يلمس لمـس
الشَّعر اللي كان يلفناوينام
مارون كرم

منقول من ديوان الشعر للشاعران خليل روكز ومارون كرم [/align]

000000000000000

اي شو هاد مشكوره يا نور بكفي نورك موجود معنه

زائر

ال في ناس بتكتب
وفي ناس بتنئل الي انكتب
بس الي كتب ولي نئل الي انكتب
دهب واغلى من الدهب
كتير مشكورة عصفورة
الله يعطيكي العافية

ياهلا بالغوالي والله ..
نورتوووووو

كتيررررر حلوي ننوشتي مشكووووووره
اموره منوره

هلا ياقلبي .. منورة

منوره يا عصفوره

النور نورك اياد

» من أجمل العبارات...